Böðvarsholtshyrna, Kambur, Stakksfell

Lagt er í hann ofan Hraunhafnar, upp í hlíðar Mælifells.
Ætlunin var að ganga á Mælifell í restina en ekki gafst tími til þess í þetta sinn.
Þegar upp á brúnina var komið var stefnan tekin austur með þeim.
Staldrað var við Bjarnarfoss og hann skoðaður frá öðru sjónarhorni en maður er vanur.
Mikið vatn var í öllum lækjum og ám og var Kálfáin straumþung.
Ákvað ég fyrir vikið að elta hana aðeins upp í hlíðina til að komast yfir þar sem hún kvíslast. Það var reyndar hin besta hugmynd því að þar gat að líta hina glæsilegustu fossa.
Þegar yfir Kálfá var komið var stefnan tekin á Böðvarsholtshyrnu og Kamb.
Uppgangan á þessi fjöll er ekki erfið, hvorki sérlega brött né há.
Kambur er ílangur en miðja vegu milli toppa er mikill móbergs hanakambur sem er ekki fær. Þurfti ég því að skella mér niður í hlíðina til að krækja fyrir þessa kletta.
Stakksfell er mikill kletta höfði sem er að mér sýndist ekki fær nema þá leið sem ég fór.