Selfjall 9. apríl

Gengið á Selfjall á Húsafelli 9. apríl 2019. Trakkið er gallað frá bílastæði að Selgili, þannig að loftlína var mæld á milli 2ja fyrstu áningarstaða. Því er heildarvegalengd aðeins meiri en ferillinn skráir, eða rúmir 9 km.

Gengið er frá bílastæðinu á Húsafelli um Kaldárbotna, sem er austasta og ein stærsta uppsprettan á Húsafelli. Þar prýða listaverk frá Páli Guðmundssyni útsýnið og gaman að staldra við. Brú er við botnana og engin þörf á að vaða. Gengið sem leið liggur að Selfjalli og Selgili. Útsýnis notið frá Efri Selhól, en víða á leiðinni er mjög fallegt að líta til Teitsgils.
Frá kolli Selgils er mjög fallegt útsýni til jökla og yfir Geitland, þó fjallið sé ekki hátt eða bratt.
Á bakaleiðinni er kjörið að fara ekki sömu leið til baka, heldur stefna frá fjallstoppnum niður að "Efra fossi" í Selgili og fylgja því niður. Þar eru nokkrir fallegir staðir og gaman að snuðra. Bakaleiðin yrði því heldur lengri en hér er sýnt og einnig seinfarnari, því gaman er að skoða Selgil og Teitsgil.

Hækkun um 277 m, létt og góð ganga, einn skór.