Þyrill

Við komum saman við Húsgagnahöllina þar sem hægt er að deila bílum og keyrum af stað kl. 8:30. Passa þarf að ekki sé setið í hverju sæti í öllum bílum. Við komum væntanlega að bílastæðinu í Botnsvogi við vörðuna hans Guðjóns frá Dröngum um kl. 9:20. Þar skiljum við eftir 2-3 bíla og sitjum þröngt í hinum bílunum inn í Litlasandsdal og leggjum ofan við olíutankana.

Gengið er á vegaslóða fyrstu kílómetrana og ofan við fallegu fossaröðina í Bláskeggsá munum við yfirgefa vegaslóðann og ganga í lynginu og að mestu leyti á kindaslóðum út með Þyrli og upp á topp. Þar er frábært útsýni yfir Hvalfjörðinn og sögusvið Harðar sögu og Hólmverja.
Þaðan er gengið inn með fjallinu að Síldarmannagötum og niður Síldarmannabrekkur að bílastæðinu í Botnsvogi. Útsýnið er mjög fallegt þarna yfir Botnsdalinn.

Vegalengd er um 8,5 km og uppsöfnuð hækkun á leiðinni ca 400 m.

Athugið að yfirleitt er hægt að stikla þessar tvær árkvíslar sem þarf að fara yfir á leiðinni. Það verður hins vegar rigning dagana fyrir helgi og gæti því bæst vatn í þær. Það sakar því ekki að taka með sér vaðskó ef þið treystið ykkur síður til að stikla, það er sérstaklega seinni kvíslin Bláskeggsá.